天上來的聲音

男聲: 咳..咳..咳....咳! 咳咳...咳咳.....咳! 咳..咳...咳!

女聲: 唉呀, 德輝, 唔見咁耐, 做乜一見番就咳成咁嘅唧?

男聲: 係哩, 一見到你, 啲痰就湧上來咯, 咳咳…咳!

女聲: 唉呀, 德輝 唔好咳住。嚟, 擔張凳仔, 俾好戲你睇。

男聲: 你同你風水豬豬嗰啲錄影帶? 我冇興趣喎。
睇你一句豬豬, 佢一句豬豬咁, 貪過癮呀!

女聲: 唔係呀德輝, 咁多年唔通我個心向住邊個你唔知嘅咩?
你寫俾我張one life one love紙仔, 我仲成日袋住, 嗱, 你睇。

男聲: 咳咳..! 我教過你幾多次呀, 啲人類未言先笑, 非奸即盜呀!
你睇佢, 笑起上來棚牙白到? 假到?

女聲: 唉呀, 德輝, 你知唔知人心係乜嘢?

男聲: 肉參我就知。

女聲: 係囉, 人心咪係肉做囉。
嗰陣時個個話我黐咗線, 係得佢信我咋德輝。
佢仲話可以幫我搵番你, 咁我咪交晒俾佢囉。

男聲: 幾億幾億交俾佢都事小, 你唔駛連嗰對天線都送埋俾佢架?

女聲: 你話嗰兩條孖辮?

男聲: 之唔係, 冇咗嗰兩條天線, 我哋點同自己星球聯絡?

女聲: 唉呀, 德輝, 你有所不知, 嗰對天線壞咗,
佢話幫我courier去美國太空總署搵佢表哥幫我哋修理,
仲話, 話唔定可以搵埋MIB幫手添。

男聲: 吓話。

女聲: 仲有嗰160幾個埋藏喺港九新界嘅生基, 你都知啦, 邊係咩風水,
我埋晒啲求救器喺度, 等天狼星搜索隊容易啲搵到我哋之嘛。

男聲: 望係咁望啦, 可能又要等到下一世…

女聲: 點都好, 總之我哋唔好再失散了, 德輝。

男聲: 你唔好再叫我德輝啦Nina, 下一世, 你叫Nina, 我就叫Richard,
失散咗...咁啦, 就用one life one love做暗號, okay?

女聲: 哦哦。

大聲公聲: 喂, 後面嗰兩個唔好顧住傾偈, 跟隊啦!

還好

遇上有人問起近來點呀, 往往不知如何作答。
敷衍的, 你會說句: ok呀, 有心。
不想敷衍的, 你會真心想告知點什麼, 但又一時想不起有什麼可告之。

跟紅頂白補看了《天水圍的日與夜》,
戲名童叟無欺, 所說的不就是日復日、夜復夜的生活點滴,
睡覺吃飯切肉炒菜晾衣拖地呆坐搣腳皮…
若非早早知此戲整體平淡,你會一直以為導演在鋪排山雨欲來。
不過早知歸早知, 心裡面還是會想, 戲嘛, 總有一點什麼會發生?
...直至角色三人在天水圍家中剝著柚子過中秋,
對白維持著平常過平常, 如:「好食喎。」同「唔, 唔, 好食。」
然而懂得計時的, 都會feel到套戲接近尾聲,
觀眾二人心知不妙, 叫道: Ann姐, 唔係就咁就完呀?
可惜無力挽, 隨著中秋場面的淡出淡入, 片尾的字幕已徐徐升上,
觀眾1反應較激, 捧著其VCD膠殼在地上叩了三個響頭,
以示佩服Ann姐有吉士, 並說要買DVD來收藏才夠誠意。
觀眾2則只識說”吓!?”。

實不相瞞, 《天水圍的日與夜》淡如開水卻未曾令我瞌眼瞓,
戲完了還有點窩心; 反而型男huge jackman的x-man外傳,
以為絕無冷場卻瞌了兩下, 點解呢, 係咪關導演事呢, 或是關觀眾事?

生活說簡單, 說起上來也不太簡單,
許導演也得花上個半兩個小時才說得清它的基本調子,
所以請不要怪我支吾以對, 當你再問起近來點呀,
我想我要拍一部《大埔暨葵涌的日與夜》報與君知。